ព្រឹត្តិការណ៍

ក្រសួងពាណិជ្ជកម្ម បានរៀបចំកម្មវិធីកិច្ចពិភាក្សាក្រោមប្រធានបទ «ការពង្រឹងការតភ្ជាប់ពាណិជ្ជកម្ម វិនិយោគ និងភស្តុភារកម្ម៖ អភិវឌ្ឍវិស័យឯកជន និងជំរុញការធ្វើពិពិធកម្មផលិតផលជាតិ» អម ពិព័រណ៍ Cambodia International Machinery Industry Fair (CIMIF) 2026 និង Cambodia International Textile & Garment Industry Exhibition (CTG) 2026 នាថ្ងៃទី១៤ ខែសីហា ឆ្នាំ២០២៦ វេលាម៉ោង ១៤:០០នាទីរសៀល នៅមជ្ឈមណ្ឌលសន្និបាត និងពិព័រណ៍កោះពេជ្រ។

គោលបំណង

កម្មវិធីកិច្ចពិភាក្សានេះត្រូវបានរៀបចំឡើងក្នុងគោលដៅយុទ្ធសាស្ត្រសំខាន់ៗរួមមាន៖

• ការស្វែងយល់ពីតួនាទីនៃការតភ្ជាប់៖ ពិភាក្សាអំពីតួនាទី និងសារៈសំខាន់នៃការតភ្ជាប់ពាណិជ្ជកម្ម វិនិយោគ និងភស្តុភារកម្ម ក្នុងការលើកកម្ពស់សមត្ថភាពប្រកួតប្រជែងរបស់វិស័យឯកជន វិស័យផលិតកម្ម និងឧស្សាហកម្មកម្ពុជា ។
• ការតភ្ជាប់បណ្តាញទីផ្សារ៖ លើកកម្ពស់ការតភ្ជាប់រវាងអ្នកផលិត អ្នកនាំចេញ វិនិយោគិន អ្នកផ្តល់សេវាភស្តុភារកម្ម និងអ្នកបញ្ជាទិញក្នុង និងក្រៅប្រទេស ។
• ការផ្លាស់ប្តូរបទពិសោធន៍ និងយុទ្ធសាស្ត្រទីផ្សារ៖ ផ្លាស់ប្តូរបទពិសោធន៍ និងទស្សនៈពាក់ព័ន្ធនឹងការសម្រួលពាណិជ្ជកម្ម ការកាត់បន្ថយថ្លៃដើមភស្តុភារកម្ម ការបង្កើនតម្លៃបន្ថែម និងការពង្រីកទីផ្សារ ។
• ការជំរុញភាពជាដៃគូ៖ ជំរុញកិច្ចសហប្រតិបត្តិការរវាងរាជរដ្ឋាភិបាល និងវិស័យឯកជន ដើម្បីទាក់ទាញការវិនិយោគ អភិវឌ្ឍសមត្ថភាពផលិតកម្ម និងជំរុញការធ្វើពិពិធកម្មផលិតផលជាតិ ។

សកម្មភាព នៃកម្មវិធី

• ១. វេទិកាពិភាក្សាតុមូល (Panel Discussion)៖ កិច្ចពិភាក្សានឹងប្រព្រឹត្តទៅដោយមានអ្នកសម្របសម្រួល ១ រូប និងវាគ្មិន ៥ រូប ។ វាគ្មិនតំណាងឱ្យក្រសួងពាណិជ្ជកម្ម ក្រសួងឧស្សាហកម្ម ក្រុមប្រឹក្សាអភិវឌ្ឍន៍កម្ពុជា វិស័យឯកជន និងជំនាញការភស្តុភារកម្ម ។
• ២. ប្រធានបទស៊ីជម្រៅ៖ អង្គពិធីនឹងជជែកដេញដោលអំពីការបង្កើនសមត្ថភាពប្រកួតប្រជែងរបស់វិស័យឯកជន កិច្ចសម្រួលពាណិជ្ជកម្មដើម្បីកាត់បន្ថយថ្លៃដើម និងការកសាងកិច្ចសហប្រតិបត្តិការរវាងរដ្ឋ និងឯកជន ។
• ៣. វគ្គសំណួរ និងចម្លើយ និងការភ្ជាប់ទំនាក់ទំនង៖ បើកឱកាសឱ្យអ្នកចូលរួមសួរសំណួរ និងផ្លាស់ប្តូរយោបល់ដោយផ្ទាល់ជាមួយវាគ្មិន ព្រមទាំងមានកម្មវិធីទស្សនាស្តង់ពិព័រណ៍ ។

សមាសភាពចូលរួម កម្មវិធីនេះត្រូវបានប្រព្រឹត្តទៅក្រោមអធិបតិភាព​ ឯកឧត្តម សំហេង បូរ៉ា រដ្ឋលេខាធិការ ក្រសួងពាណិជ្ជកម្ម  និងសហការរៀបចំជាមួយក្រុមហ៊ុន Yorker Trade & Marketing Service Co., Ltd.។ កម្មវិធីនេមានអ្នកចូលរួមសរុបចំនួន ១៦០រូប ។ អ្នកចូលរួមរួមមានតំណាងមកពីក្រសួងពាណិជ្ជកម្ម ក្រសួងឧស្សាហកម្ម បច្ចេកវិទ្យា វិទ្យាសាស្ត្រ និងនវានុវត្តន៍ ក្រុមប្រឹក្សាអភិវឌ្ឍន៍កម្ពុជា មន្ទីរពាណិជ្ជកម្មរាជធានីភ្នំពេញ សភាពាណិជ្ជកម្មកម្ពុជា ព្រមទាំងសមាគម សហគ្រាស អ្នកជំនាញផ្នែកភស្តុភារកម្ម និងដៃគូអន្តរជាតិ ។