សហភាពសហព័ន្ធយុវជនកម្ពុជា (ស.ស.យ.ក.) បានផ្តួចផ្តើមបំផុសការរៀបចំព្រឹត្តិការណ៍ នគរសង្គ្រាន្ត ដែលបានប្រព្រឹត្តទៅចាប់ពីថ្ងៃទី១៤-១៩ ខែមេសា ឆ្នាំ​ ២០២៦ នៅរាជធានីភ្នំពេញ។ នគរសង្រ្គាន្ត រៀបចំឡើងក្នុងគោលបំណងប្រមូលផ្តុំនូវអនុស្សាវរីយន៍ដែលនាំឲ្យបេះដូងប្រជាជនក្នុងរាជធានី និងបណ្តាខេត្តនឹករលឹកចង់ត្រឡប់មកទឹកដីកំណើត ដើម្បីជួបជុំគ្រួសារ បងប្អូននិងមិត្តភក្តិក្នុងទិដ្ឋភាពមួយដែលត្រូវទម្លាក់ចោលនូវកង្វល់ទាំងឡាយដែលបានស្ពាយកន្លងមក ហើយងាកមកជួបជុំគ្រួសារញាតិមិត្តជិតឆ្ងាយប្រកបទៅដោយក្តីស្រឡាញ់ក្តីនឹករលឹកផ្សារភ្ជាប់ជាមួយអត្តសញ្ញាណវប្បធម៌ជាតិ និងការចូលរួមអបអរសាទររបស់ប្រជាពលរដ្ឋក្នុងឱកាសបុណ្យចូលឆ្នាំប្រពៃណីជាតិខ្មែរ។ បន្ថែមពីនេះ ព្រឹត្តិការណ៍នេះក៏បានប្រមូលផ្តុំនូវសារ:សំខាន់ ក៏ដូចជាផ្តល់ឱកាសដល់យុវជន យុវនារី ប្រជាពលរដ្ឋគ្រប់ស្រទាប់ ភ្ញៀវទេសចរជាតិនិងអន្តរជាតិបានសិក្សាអំពីកិត្តិនាម ភាពចម្រុះនៃវប្បធម៌ អរិយធម៌ ប្រពៃណី និងសាសនា ដើម្បីបំផុសស្មារតីដល់យុវជន​ យុវនារី និងកូនចៅខ្មែរជំនាន់ក្រោយឲ្យមានមោទកភាពស្រឡាញ់វប្បធម៌ អរិយធម៌ ប្រពៃណី ទំនៀមទម្លាប់ តាមរយៈការបំផុសស្មារតីរួបរួមកម្លាំងសាមគ្គីជាធ្លុងមួយ និងជាមហាគ្រួសារតែមួយ។ ដើម្បីចូលរួមអបអរសាទរព្រឹត្តិការណ៍ខាងលើ ក្រុមការងារកម្មវិធី “សួនមុនីហទ័យ និងពិព័រណ៍នគរសង្ក្រាន្ដ” នឹងចូលរួមបង្ហាញពីអត្ថន័យ និងនាំមកជូននូវផ្ទាំងទស្សនិយភាពថ្មីៗដែលជាការរួមបញ្ចូលគ្នានូវសិល្បៈ​ វប្បធម៌ ប្រពៃណី ទំនៀមទម្លាប់ ល្បែងប្រជាប្រិយ ការតាំងបង្ហាញសិប្បកម្ម ចម្លាក់​ ប្រាក់ស្ពាន់ និងការផ្សព្វផ្សាយម្ហូបអាហារខ្មែរជាច្រើនមុខប្រចាំតំបន់នានាក្នុងព្រះរាជាណាចក្រកម្ពុជាផងដែរ។