ក្រសួងពាណិជ្ជកម្មមានកិត្តិយសសូមជម្រាបដំណឹងដល់ លោកអ្នកឧកញ៉ា អ្នកឧកញ៉ា ឧកញ៉ា លោក- លោកស្រី ដែលជាពាណិជ្ជករ ផលិតករ វិនិយោគិន ម្ចាស់ក្រុមហ៊ុន និងសាធារណជនទាំងអស់ ជ្រាបថា ក្រសួងពាណិជ្ជកម្មនឹងរៀបចំ «វេទិកាពាណិជ្ជកម្មឌីជីថលកម្ពុជា និងពិព័រណ៍អនឡាញ លើកទី៣ (The 3^rd Cambodia Digital Trade Forum and Online Expo)» ដែលនឹងប្រព្រឹត្តទៅចាប់ពីថ្ងៃទី១១-១៣ ខែកញ្ញា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ (អគារ G-L) រាជធានីភ្នំពេញ ក្នុងគោលបំណងជំរុញកិច្ចពិភាក្សាអំពីទិដ្ឋភាពពាណិជ្ជកម្មឌីជីថល ក្របខ័ណ្ឌគោលនយោបាយ ការផ្សព្វផ្សាយ និងជំរុញការនាំចេញផលិតផលកម្ពុជាទៅកាន់ទីផ្សារអន្តរជាតិ តាមរយៈការជំរុញការប្រើប្រាស់ថ្នាលពាណិជ្ជកម្មតាមប្រព័ន្ធអេឡិចត្រូនិកក្នុងស្រុក និងអន្តរជាតិ ជាពិសេសថ្នាល CambodiaTrade.com របស់ក្រសួងពាណិជ្ជកម្ម។ ជាមួយគ្នានេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នឹងផ្តល់កិត្តិយសអញ្ជើញចូលរួមជាអធិបតីដ៏ខ្ពង់ខ្ពស់ក្នុងពិធីសម្ពោធវេទិកាខាងលើជាផ្លូវការ នារសៀលថ្ងៃទី១១ ខែកញ្ញា ឆ្នាំ២០២៦ ផងដែរ។

           ព្រឹត្តិការណ៍ខាងលើនឹងមាន៖ ១-ការថ្លែងសុន្ទរកថាគន្លឹះ ព្រមទាំងកិច្ចសន្ទនាកម្រិតថ្នាក់ដឹកនាំ ការបង្ហាញប្រព័ន្ធអេកូឡូស៊ីរបស់ក្រុមហ៊ុន Apple និងបញ្ញាសិប្បនិម្មិត (AI) សន្តិសុខសាយប័រនិងទំនុកចិត្តឌីជីថល ភស្តុភារកម្មឆ្លងកាត់ព្រំដែន, ២-វេទិកាស្ត្រីក្នុងវិស័យពាណិជ្ជកម្មឌីជីថល, ៣-កម្មវិធីបង្កើនសមត្ថភាពនិងភាពអង់អាចរបស់យុវជន តាមរយៈការជជែកដេញដោល និងកម្មវិធីប្រកួតប្រជែងជាក្រុម (Hackathon), និង៤-ការរៀបចំស្តង់តាំងបង្ហាញផលិតផល និងសេវាកម្មឌីជីថលជាច្រើនប្រភេទរួមមាន៖ ផលិតផលកម្ពុជា #MadeInCambodia ផលិតផលស្ត្រី #MadeByHer ផលិតផលសម្គាល់ភូមិសាស្ត្រ ផលិតផលម៉ាកសមូហភាព អាហារនិងភេសជ្ជៈ សេវាកម្មអ៊ីនធឺណែតពាណិជ្ជកម្មតាមប្រព័ន្ធអេឡិចត្រូនិក ធនាគារ ភ្នាក់ងារដឹកជញ្ជូន សេវាកម្មក្លោដ និង AI ជាដើម។