(ណាននីង, ក្វាងស៊ី, ចិន)៖ នាព្រឹកថ្ងៃអង្គារ ទី១៥ ខែកញ្ញា ឆ្នាំ២០២៦ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានដឹកនាំក្រុមការងារបច្ចេកទេសចុះពិនិត្យមើលវឌ្ឍនភាពការងារនៃការរៀបចំ និងចូលរួមពិព័រណ៍ចិន-អាស៊ាន លើកទី២៣ នៅមជ្ឈមណ្ឌលតាំងពិព័រណ៍ និងសន្និសីទអន្តរជាតិក្រុងណាននីង តំបន់ស្វយ័តក្វាងស៊ី សាធារណរដ្ឋប្រជាមានិតចិន។

ក្នុងឱកាសនោះ ឯកឧត្តមរដ្ឋលេខាធិការ និងក្រុមការងារ បានចុះពិនិត្យមើលទីតាំងជាក់ស្តែងនៃសំណង់ពន្លាជាតិកម្ពុជា ដែលមានទំហំ ១៦០ ម៉ែត្រក្រឡា ដោយបានជ្រើសរើសយកខេត្តកំពង់ស្ពឺ ជា «ទីក្រុងស្រស់ប្រិមប្រិយ» ដើម្បីផ្សព្វផ្សាយក្នុងព្រឹត្តិការណ៍នេះ និងបានបន្តដំណើរទៅពិនិត្យមើលទីតាំងស្តង់ពាណិជ្ជកម្មកម្ពុជា និងផ្ទះរួម នៅតំបន់ D ផងដែរ។

សូមជម្រាបជូនផងដែរថា លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ នឹងអញ្ជើញដឹកនាំគណៈប្រតិភូកម្ពុជា ចូលរួមក្នុងពិព័រណ៍ចិន-អាស៊ាន លើកទី២៣ ដែលនឹងប្រព្រឹត្តទៅចាប់ពីថ្ងៃទី១៧-២១ ខែកញ្ញា ឆ្នាំ២០២៦ ក្រោមមូលបទ «កាលានុវត្តភាពតំបន់ពាណិជ្ជកម្មសេរីចិន-អាស៊ាន ៣.០ ជីវិតកាន់តែប្រសើរ»។