(សៀមរាប)៖ នាព្រឹកថ្ងៃសុក្រ ទី២៨ ខែកុម្ភៈ ឆ្នាំ២០២៥ នៅមន្ទីរពាណិជ្ជកម្មខេត្តសៀមរាប ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម បានអញ្ជើញជាអធិបតីក្នុងសិក្ខាសាលា ស្តីពី “កាលានុវត្តភាពថ្មីនៃអាជីវកម្មបន្លែផ្លែឈើ” ក្នុងកំឡុងពេលពិព័រណ៍ផលិតផលខ្មែរ និងបន្លែផ្លែឈើ លើកទី១៨ ឆ្នាំ២០២៥ នៅខេត្តសៀមរាប ដែលមានការអញ្ជើញចូលរួមពីតំណាងរដ្ឋបាលខេត្ត មន្ទីរពាក់ព័ន្ធ ជាពិសេសសហគមន៍កសិកម្ម ម្ចាស់កសិដ្ឋាន អ្នកដាំដុះបន្លែផ្លែឈើ អ្នកចែកចាយបន្ត និងភាគីពាក់ព័ន្ធផ្សេងៗទៀតក្នុងវិស័យបន្លែផ្លែឈើ នៅក្នុងខេត្តសៀមរាប។

សិក្ខាសាលានេះ ធ្វើឡើងក្នុងគោលបំណងដើម្បីស្វែងរក និងពង្រីកទីផ្សារ ជូនផលិតករ និងពាណិជ្ជករក្នុងស្រុកពាក់ព័ន្ធនឹងផលិតផលបន្លែផ្លែឈើ តាមរយៈវេទិកាផ្គូផ្គងពាណិជ្ជកម្ម រវាងសហគមន៍កសិករ ម្ចាស់កសិដ្ឋាន អ្នកដាំដុះបន្លែផ្លែឈើ ជាមួយអ្នកចែកចាយ អ្នកលក់ដុំ-រាយ អ្នកកែច្នៃ និងម្ចាស់អាជីវកម្មនានា ជាពិសេសផ្សព្វផ្សាយ និងជំរុញការនាំចេញផលិតផលខ្មែរទៅកាន់ ទីផ្សារអន្តរជាតិ។ 

នៅក្នុងសិក្ខាសាលាដ៏មានសារៈសំខាន់នេះ មានការធ្វើបទបង្ហាញចំនួន ៤ ប្រធានបទ រួមមាន៖ ១-យុទ្ធសាស្ត្រជំរុញផលិតផលសក្ដានុពលកម្ពុជាដើម្បីនាំចេញ ២-សក្តានុពលផលិតកម្មបន្លែផ្លែឈើក្នុងខេត្តសៀមរាប ៣-បែបបទនីតិវិធីបញ្ជូនផលិតផលកម្ពុជាចូលផ្សារទំនើប និង ៤-វឌ្ឍនភាពខ្សែច្រវាក់ផលិតកម្ម និងការចាប់ដៃគូអាជីវកម្មរបស់សហគមន៍បន្លែផ្លែឈើ។