(យូណាន, ចិន)៖ នាព្រឹកថ្ងៃព្រហស្បត្តិ៍ ទី១៩ ខែមិថុនា ឆ្នាំ២០២៥ នៅទីក្រុងគុនមិញ ខេត្តយូណាន សាធារណរដ្ឋប្រជាមានិតចិន លោកជំទាវ សុមេធ សុមនា អនុរដ្ឋលេខាធិការ ក្រសួងពាណិជ្ជកម្ម បានដឹកនាំគណៈប្រតិភូកម្ពុជាអញ្ជើញចូលរួមពិធីសម្ពោធ “ពិព័រណ៍ពាណិជ្ជកម្មចិន-អាស៊ីខាងត្បូងលើកទី៩ និងពិព័រណ៍ពាណិជ្ជកម្មផលិតផលនាំចេញ នាំចូលគុនមិញលើកទី២៩” ដែលបានប្រព្រឹត្តទៅក្រោមអធិបតីភាព ឯកឧត្តម Wang Dongming អនុប្រធានកម្មាធិការអចិន្ត្រៃយ៍នៃសភាប្រជាជនចិន និងមានការចូលរួមពី ឯកឧត្តម Wang Yubo អភិបាលខេត្តយូណាន, ឯកឧត្តម Yan Dong អនុរដ្ឋមន្ត្រីនៃក្រសួងពាណិជ្ជកម្មចិន, ឧបនាយករដ្ឋមន្ត្រីស្តីទីនៃរដ្ឋាភិបាលបណ្តោះអាសន្នអហ្វហ្គានីស្ថាន, ឧបនាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវ, ឧបនាយករដ្ឋមន្ត្រីនិងជារដ្ឋមន្ត្រីនៃការិយាល័យនាយករដ្ឋមន្ត្រីនៃសាធារណរដ្ឋសហភាពមីយ៉ាន់ម៉ា, ឧបនាយករដ្ឋមន្ត្រីនៃសាធារណរដ្ឋសង្គមនិយមវៀតណាម និងមានការអញ្ជើញចូលរួមពីភ្ញៀវកិត្តិយសជាន់ខ្ពស់ជាច្រើនរូប។

នាពេលរសៀលថ្ងៃខែឆ្នាំដដែល លោកជំទាវអនុរដ្ឋលេខាធិការ បានអញ្ជើញចូលរួមវេទិកាកិច្ចសហប្រតិបត្តិការអន្តរជាតិលើកទី៤ ស្តីពីពាណិជ្ជកម្ម និងវិនិយោគនៃកិច្ចព្រមព្រៀងអាសិប (ខេត្តយូណាន) ដែលជាកម្មវិធីអមនៃព្រឹត្តិការណ៍ពិព័រណ៍។

វេទិកានេះ រៀបចំឡើងដើម្បីជំរុញកិច្ចសហប្រតិបត្តិការរវាងប្រទេសជាសមាជិកអាសិប ក្នុងវិស័យពាណិជ្ជកម្ម និងវិនិយោគ ដោយកំណត់ប្រធានបទបួនសម្រាប់ពិភាក្សា៖ (១)ការអនុវត្តកិច្ចព្រមព្រៀងអាសិប និងសំណើសកម្មភាពការងារប្រកបដោយគុណភាពខ្ពស់ (២)បង្កើនប្រសិទ្ធភាពនៃកិច្ចសហប្រតិបត្តិការឧស្សាហកម្ម និងខ្សែច្រវាក់ផ្គត់ផ្គង់ក្រោមកិច្ចព្រមព្រៀងអាសិប (៣)ការអភិវឌ្ឍកិច្ចព្រមព្រៀងអាសិបថ្មី និងរួមបញ្ចូលគ្នានៃកាលានុវត្តភាពសម្រាប់ពាណិជ្ជកម្មសេវាកម្មរបស់ចិន និង (៤)ខ្សែច្រវាក់សម្របសម្រួលទាំង៥ របស់សមាជិកអាសិបរួមមាន៖ ឧស្សាហកម្ម, ការផ្គត់ផ្គង់, តម្លៃ, នវានុវត្តន៍, និងការត្រួតពិនិត្យខ្សែច្រវាក់និងការទទួលស្គាល់វិធានដើមកំណើតទំនិញ៕